રેખ્તા
હિન્દવી
સૂફીનામા
રાજસ્થાની
આજ સલુણા એકાદશી
aaj saluna ekadashi
આજ સલુણા એકાદશી
aaj saluna ekadashi
આજ સલુણા એકાદશી, ને મારે છે ઉપવાસ;
અગ્યારશ કરવી છે.
બાઈ રે પાડોશણ બેનડી, મને દેવતા હોય તો આલ્ય;
અગ્યારશ કરવી છે.
સવા મણનો શીરો કીધો, અરધા મણનો ભાત;
અગ્યારશ કરવી છે.
જમી જુઠીને પલંગ પોઢ્યાં, મુખડે પાન પચાસ;
અગ્યારશ કરવી છે.
સાંજ પડી ને ઘેર પીયુજી આવ્યા, જમવાની શું વાર?
અગ્યારશ કરવી છે.
જમવું હોય તો જમી લેજો, ને મારે છે ઉપવાસ;
અગ્યારશ કરવી છે.
અધરાતે પેટડીયાં દુખ્યાં, પીડાનો નહીં પાર;
અગ્યારશ કરવી છે.
પિયુએ આવી પૂછ્યું, ગોરી, શું તમને મંદવાડ?
અગ્યારશ કરવી છે.
વડોદરાથી વૈદ તેડાવું, જોવે તમારી નાડ્ય;
અગ્યારશ કરવી છે.
વૈદે આવી પૂછ્યું, બેની, શું ખાધું ’તું આજ?
અગ્યારશ કરવી છે.
મારે હતી આજ એકાદશી, ને મેં કીધો અપવાસ;
અગ્યારશ કરવી છે.
જુઠાં બેની જુઠું ન બોલો, આ ખાધાનો મંદવાડ;
અગ્યારશ કરવી છે.
સ્રોત
- પુસ્તક : ગુજરાતી લોકસાહિત્યમાળા – મણકો– ૫ (પૃષ્ઠ ક્રમાંક 175)
- સંપાદક : ગુજરાત લોકસાહિત્ય સમિતિ (મંજુલાલ ર. મજમૂદાર, બચુભાઈ રાવત, મનુભાઈ જોધાણી, પદ્મશ્રી દુલાભાઈ કાગ, મેરૂભા ગઢવી, પુષ્કર ચંદરવાકર, ચન્દ્રકાન્ત વાઘેલા, કનૈયાલાલ જોશી, પ્રહ્લાદ ચી. પરીખ, હરિલાલ કાળીદાસ મોઢા.
- પ્રકાશક : ગુજરાત લોકસાહિત્ય સમિતિ, અમદાવાદ
- વર્ષ : 1966