રેખ્તા
હિન્દવી
સૂફીનામા
રાજસ્થાની
છેલ દરવાજે ઢોલચી વાગે રે
chhel darwaje Dholchi wage re
છેલ દરવાજે ઢોલચી વાગે રે,
છેલ દરવાજે ઢોલચી;
હાર્યે વાગે ગજરા રો ઢોલ રે;
નાચણિયું નાચતું નથી;
ચંદરમા ઉગતો નથી;
પે’રી ઓઢીને સાવરીયે હેંડી;
પે’રી ઓઢીને સાવરીયે હેંડી;
માથે કાળી અંધારી રાત રે;
નાચણિયું નાચતું નથી,
ચંદરમા ઉગતો નથી.
નાનો દેવરીયો લાડકો મારો,
એ તો લાખેણા કરતો લાડ;
દેરાણીને રીહલડી ચડતી નથી;
નાચણિયું નાચતું નથી;
ચંદરમા ઉગતો નથી;
પરણેતરની પે’લ રાતડિયે મને,
કાળા વેંછૂડે માર્યો ડંખ;
પીયુજી મારો જાગતો નથી;
નાચણિયું નાચતું નથી;
ચંદરમા ઉગતો નથી;
સામી મોટલાતુમાં દીવડો સગ બળે,
મારી નણદી જોવે છે વાટલડી;
પરણ્યો મારો જાગતો નથી;
નાચણિયું નાચતું નથી;
ચંદરમા ઉગતો નથી;
સે’લ જાણીને છેડલો ઝાલ્યો;
નેંકળ્યો સગો જેઠ:
મારું મન માનતું નથી;
નાચણિયું નાચતું નથી;
ચંદરમા ઉગતો નથી.
સ્ત્રીની મનોદશાની પીડાનું દર્શન કરાવતું ગીત સૌ પ્રથમ લાડુ ડોસીએ ઉપાડ્યું અને મેં કોડિયાના દીવાના અજવાળે ગીત લખવા માંડ્યું, વઢિયારમાં આ ગીત બજાણિયા કોમમાં ગવાય છે અને નાંડોદામાં પણ ગવાય છે, પણ ઢોલકીની વાત છે એટલે બજાણિયાનું આ ગીત હોવાનો સંભવ છે.
સ્રોત
- પુસ્તક : ગુજરાતી લોકસાહિત્યમાળા – મણકો– ૫ (પૃષ્ઠ ક્રમાંક 254)
- સંપાદક : ગુજરાત લોકસાહિત્ય સમિતિ (મંજુલાલ ર. મજમૂદાર, બચુભાઈ રાવત, મનુભાઈ જોધાણી, પદ્મશ્રી દુલાભાઈ કાગ, મેરૂભા ગઢવી, પુષ્કર ચંદરવાકર, ચન્દ્રકાન્ત વાઘેલા, કનૈયાલાલ જોશી, પ્રહ્લાદ ચી. પરીખ, નિરંજન સરકાર.
- પ્રકાશક : ગુજરાત લોકસાહિત્ય સમિતિ, અમદાવાદ
- વર્ષ : 1966