રેખ્તા
હિન્દવી
સૂફીનામા
રાજસ્થાની
છલકાતું આવે બેડલું
chhalkatun aawe beDalun
છલકાતું આવે બેડલું,
છલકાતી આવે નાર રે, મારી સાહેલીનું બેડલું—છલકાતું આવે બેડલું.
મારા ગામના સુતારી રે, વીરા તમને વીનવું;
મારી માંડવડી ઘડી લાવો રે, મારી સાહેલીનું બેડલું—છલકાતું આવે બેડલું.
મારા ગામના લુહારી રે, વીરા તમને વીનવું;
મારી માંડવડી મઢી લાવો રે, મારી સાહેલીનું બેડલું—છલકાતું આવે બેડલું.
મારા ગામના રંગારી રે, વીરા તમને વીનવું;
મારી માંડવડી રંગી લાવો રે, મારી સાહેલીનું બેડલું—છલકાતું આવે બેડલું.
મારા ગામના કુંભારી રે, વીરા તમને વીનવું;
મારા ગરબે કોડિયાં મેલાવો રે, મારી સાહેલીનું બેડલું—છલકાતું આવે બેડલું.
મારા ગામના પિંજારી રે, વીરા તમને વીનવું;
મારા ગરબે દિવેટ લાવો રે, મારી સાહેલીનું બેડલું—છલકાતું આવે બેડલું.
મારા ગામનાં ઘાંચીડા રે, વીરા તમને વીનવું;
મારે ગરબે દિવેલ પુરાવો રે, મારી સાહેલીનું બેડલું—છલકાતું આવે બેડલું.
મારા ગામના મોટીઆરા રે, વીરા તમને વીનવું;
મારો ગરબો ભલેરો શણગાર રે, મારી સાહેલીનું બેડલું—છલકાતું આવે બેડલું.
મારા ગામની દીકરિયું રે, બેની તમને વીનવું;
મારો ગરબો ભલેરો ગવડાવો રે, મારી સાહેલીનું બેડલું—છલકાતું આવે બેડલું.
મારા ગામની વવારુ રે, ભાભી તમને વીનવું;
મારો ગરબો ભલેરો ઝીલાવો રે, મારી સાહેલીનું બેડલું—છલકાતું આવે બેડલું.
સ્રોત
- પુસ્તક : ગુજરાતી લોકસાહિત્યમાળા – મણકો– ૫ (પૃષ્ઠ ક્રમાંક 185)
- સંપાદક : ગુજરાત લોકસાહિત્ય સમિતિ (મંજુલાલ ર. મજમૂદાર, બચુભાઈ રાવત, મનુભાઈ જોધાણી, પદ્મશ્રી દુલાભાઈ કાગ, મેરૂભા ગઢવી, પુષ્કર ચંદરવાકર, ચન્દ્રકાન્ત વાઘેલા, કનૈયાલાલ જોશી, પ્રહ્લાદ ચી. પરીખ, વસંત જોધાણી.
- પ્રકાશક : ગુજરાત લોકસાહિત્ય સમિતિ, અમદાવાદ
- વર્ષ : 1966