રેખ્તા
હિન્દવી
સૂફીનામા
રાજસ્થાની
ચાંદલિયો
chandaliyo
ચાંદલિયો
chandaliyo
એ પેલો ચાંદલિયો રે મા, મુંને રંબાને, આલો,
નખતર ચુંટીને, રે મારા હાથમાં આલો; ઓ પેલો.
રૂવે ને રાતડલો રે થાય, ચાંદા સામું જુએ!
માતા રે જસોદાજી, હરિનાં આંસુડાં લુએ; ઓ પેલો.
આકાશે ચાંદલિયો વસે, કેમ આલું; રે કાન?
છોકરડાં તો સૌને છે, પણ તુંને નઈં સાન; ઓ પેલો.
ચણા ને ચારોળી રે તારે ગજવે ઘાલું,
નખતર ચુંટીને, તારા હાથમાં આલું ઓ પેલો.
સોના થાળીમાં પાણી ઘાલીને, ચાંદલિયો દાખ્યો,
એમ જસોદાએ હરિને રોતો રે રાખ્યો; ઓ પેલો.
સ્રોત
- પુસ્તક : ગુજરાતી લોકસાહિત્યમાળા – મણકો– ૯ (પૃષ્ઠ ક્રમાંક 77)
- સંપાદક : ગુજરાત લોકસાહિત્ય સમિતિ (મંજુલાલ ર. મજમુદાર, પદ્મશ્રી દુલાભાઈ કાગ, બચુભાઈ રાવત, મનુભાઈ જોધાણી, હરિવલ્લભ ભાયાણી, પુષ્કર ચંદરવાકર, દુલેરાય કારણી, ચીમનલાલ ભટ્ટ, સુધાબહેન ર. દેસાઈ, પી. સી. પરીખ, વસંત જોધાણી.
- પ્રકાશક : ગુજરાત લોકસાહિત્ય સમિતિ, અમદાવાદ
- વર્ષ : 1968