રેખ્તા
હિન્દવી
સૂફીનામા
રાજસ્થાની
ભીડ
bheeD
ભીડ
bheeD
રામે ન ભાંગી મારી ભીડ રે હરિહર!
રામે ન ભાંગી મારી ભીડ રે.
અશોક વનમાં બેઠાં સીતાજી,
સાત સમુદર નીર રે, હરિહર!
રામે ન ભાંગી મારી ભીડ રે.
વનમાં સીતાજી કાગળિયાં મોકલે,
સંદેશો લઈ જાવ હનુમાન વીર રે, હરિહર!
રામે ન ભાંગી મારી ભીડ રે.
કાગળ વાંચીને રામ વે’લેરા આવજો,
સીતાજીની ભાંગજો ભીડ રે, હરિહર!
રામે ન ભાંગી મારી ભીડ રે.
રામ વિના સીતાને નીંદરા ન આવે,
શોષેં સુકાણાં શરીર રે, હરિહર!
રામે ન ભાંગી મારી ભીડ રે.
રામ વિના સીતાને અન્ન ન ભાવે,
કંઠે ન ઉતરે નીર રે, હરિહર!
રામે ન ભાંગી મારી ભીડ રે.
કાગળ વાંચીને રામ વેગે પધાર્યા,
સીતાજીની ભાંગી ભીડ રે, હરિહર!
રામે ન ભાંગી મારી ભીડ રે.
સૂરજના રથ પર ભમરો જ બેઠો,
લખમણે સાંધ્યા બાણ રે, હરિહર!
રામે ન ભાંગી મારી ભીડ રે.
રાવણ મારીને રામ વેલા પધાર્યા,
સીતાજીની ભાંગી ભીડ રે, હરિહર!
રામે ન ભાંગી મારી ભીડ રે.
સ્રોત
- પુસ્તક : ગુજરાતી લોકસાહિત્યમાળા – મણકો– 7 (પૃષ્ઠ ક્રમાંક 79)
- સંપાદક : ગુજરાત લોકસાહિત્ય સમિતિ (મંજુલાલ ર. મજમુદાર, પદ્મશ્રી દુલાભાઈ કાગ, બચુભાઈ રાવત, મનુભાઈ જોધાણી, હરિવલ્લભ ભાયાણી, પુષ્કર ચંદરવાકર, દુલેરાય કારણી, ચીમનલાલ ભટ્ટ, સુધાબહેન ર. દેસાઈ, પી. સી. પરીખ. હરિલાલ કા. મોઢા.
- પ્રકાશક : ગુજરાત લોકસાહિત્ય સમિતિ, અમદાવાદ
- વર્ષ : 1968