બાર બાર વરસે પસમલ પધાર્યા

બાર બાર વરસે પસમલ પધાર્યા, ઘોડા બાંધો ઘોડાહાર,

પસમલ ભલે પધાર્યા.

ચોરે તે બેઠા હો દાદાજી, જોજો વહુવારૂનાં ખેલ;

મોતીયલ ક્યાં વેરાણાં?

હું એ શું જાણું મારા પસમલ દીકરા, જઈ માતાને પૂછો;

પસમલ ભલે પધાર્યા.

સાંગા માંચીએ બેઠાં હો માતાજી, જો જો વહુવારૂનાં ખેલ;

મોતીયલ ક્યાં વેરાણાં?

હું એ શું જાણું મારા પસમલ દીકરા, જઈ બંધવાને પૂછો;

પસમલ ભલે પધાર્યો.

ઘોડો ખેલવતા હો બંધવાજી, જોજો વહુવારુનાં ખેલ;

મોતીયલ ક્યાં વેરાણાં?

હું એ શું જાણું મારા પસમલ બંધવા, જઈ ભોજાઈને પૂછો;

પસમલ ભલે પધાર્યા.

બેટડી ધવરાતાં હો ભોજાઈ જી, જોજો વહુવારૂનાં ખેલ;

મોતીયલ ક્યાં વેરાણાં?

દિયર ભોજાઈ બે હોળી રે રમતાં, હડિયે પડીયેલ હાથ;

મોતીયલ ત્યાં વેરાણા.

પુસ્તક : ગુજરાતી લોકસાહિત્યમાળા – મણકો– ૫ (પૃષ્ઠ ક્રમાંક 140)
સંપાદક : ગુજરાત લોકસાહિત્ય સમિતિ (મંજુલાલ ર. મજમૂદાર, બચુભાઈ રાવત, મનુભાઈ જોધાણી, પદ્મશ્રી દુલાભાઈ કાગ, મેરૂભા ગઢવી, પુષ્કર ચંદરવાકર, ચન્દ્રકાન્ત વાઘેલા, કનૈયાલાલ જોશી, પ્રહ્લાદ ચી. પરીખ, નિરંજન સરકાર.
પ્રકાશક : ગુજરાત લોકસાહિત્ય સમિતિ, અમદાવાદ
વર્ષ : 1966

bar bar warse pasmal padharya