રેખ્તા
હિન્દવી
સૂફીનામા
રાજસ્થાની
દીલડાનો ચોર
dilDano chor
સૌ એ ઓર્યો’તો સોનીડો રે માડી, મેં યે ઓર્યો મનિયાર,
એ તો મારા કલેજાની કોર, માડી, કલેજાની કોર;
હઈયાનો હરનાર, દલડાનો ચોર.
સૌ એ ઓર્યો’તો દોશીડો રે, માડી, મેં યે ઓર્યો મનિયાર,
તો મારા કલેજાની કોર, માડી, કલેજાની કોર;
હઈયાનો હરનાર, દલડાનો ચોર.
સૌ એ ઓર્યો’તો મોચીડો રે, માડી, મેં યે ઓર્યો મનિયાર,
એ તો મારા કલેજાની કોર, માડી, કલેજાની કોર;
હઈયાનો હરનાર, દલડાનો ચોર.
સૌ એ ઓ’ર્યાતો માળીડો રે, માડી, મેં યે ઓર્યો મનિયાર,
એ તો મારા કલેજાની કોર, માડી, કલેજાની કોર;
હઈયાનો હરનાર, દલડાનો ચોર.
સોનીડો તે લાવે હાંસડી રે, માડી, મનિયાર રાતા ચૂડલા,
ચૂડલો પેર્યાના કોડ રે માડી, મને ચૂડલો પેર્યાના કોડ;
એ તો મારા કલેજાની કોર, માડી, કલેજાની કોર.
દોશીડો તે લાવે ચૂંદડી રે, માડી મનિયાર પીળા ચૂડલા,
ચુડલો પેર્યાના કોડ રે માડી, મને ચુડલો પેર્યાના કોડ;
એ તો મારા કલેજાની કોર, માડી, કલેજાની કોર.
હઈયાનો હરનાર, દલડાનો ચોર.
મોચીડો તે લાવે મોજડી રે, માડી, મનિયાર હીરા જડ્યા ચુડલા,
ચુડલો પેર્યાના કોડ રે, માડી, મને ચુડલો પેર્યાના કોડ;
એ તો મારા કલેજાની કોર, માડી. કલેજાની કોર,
હઈયાનો હરનાર, દલડાનો ચોર.
માળીડો તે લાવે ગજરા રે, માડી, મનિયાર માણેકના ચુડલા.
ચુડલો પેર્યાના કોડ રે, માડી, મને ચુડલો પેર્યાના કોડ;
એ તો મારા કલેજાની કોર, માડી, કલેજાની કોર,
હઈયાનો હરનાર, દલડાનો ચોર.
આ ગીત ચંડીસર ગામનાં સમુબેન કબીરા પાસેથી મળેલ છે.
સ્રોત
- પુસ્તક : ગુજરાતી લોકસાહિત્યમાળા – મણકો– ૯ (પૃષ્ઠ ક્રમાંક 154)
- સંપાદક : ગુજરાત લોકસાહિત્ય સમિતિ (મંજુલાલ ર. મજમુદાર, પદ્મશ્રી દુલાભાઈ કાગ, બચુભાઈ રાવત, મનુભાઈ જોધાણી, હરિવલ્લભ ભાયાણી, પુષ્કર ચંદરવાકર, દુલેરાય કારણી, ચીમનલાલ ભટ્ટ, સુધાબહેન ર. દેસા ઈ, પી. સી. પરીખ, પુરષોત્તમ સોલંકી)
- પ્રકાશક : ગુજરાત લોકસાહિત્ય સમિતિ, અમદાવાદ
- વર્ષ : 1968