અંગોઠડી વિસરી રે

મારા ફરિયા વચ્ચે લીલી પીરી લીંબડી રે,

ન્યાં રમતાં દી’ ને રાત, રમતાં અંગોઠડી વિસરી રે;

સસરા, જડી હોય તો દયો અંગોઠડી રે,

મારી સાસુજી દેશે ગાર્ય, રમતાં અંગોઠડી વિસરી રે.

મારા ફરિયા વચ્ચે લીલી પીરી લીંબડી રે,

ત્યાં રમતાં દી’ ને રાત, રમતાં અંગોઠડી વિસરી રે;

જેઠ, જડી હોય તો દયો અંગોઠડી રે,

મારી જેઠાણી દેશે ગાર્ય, રમતાં અંગોઠડી વિસરી રે.

મારા ફરિયા વચ્ચે લીલી પીરી લીંબડી રે,

ન્યાં રમતાં દી’ ને રાત, રમતાં અંગોઠડી વિસરી રે;

દેર, જડી હોય તો દયો અંગોઠડી રે,

મારી દેરામી દેશે ગાર્ય, રમતાં અંગોઠડી વિસરી રે.

મારા ફરિયા વચ્ચે લીલી પીરી લીંબડી રે,

ન્યાં રમતાં દી’ ને રાત, રમતાં અંગોઠડી વિસરી રે;

પરણ્યા, જડી હોય તો દયો અંગોઠડી રે,

મારી નણંદડી દેશે ગાર્ય, રમતાં અંગોઠડી વિસરી રે.

પુસ્તક : ગુજરાતી લોકસાહિત્યમાળા – મણકો– 7 (પૃષ્ઠ ક્રમાંક 66)
સંપાદક : ગુજરાત લોકસાહિત્ય સમિતિ (મંજુલાલ ર. મજમુદાર, પદ્મશ્રી દુલાભાઈ કાગ, બચુભાઈ રાવત, મનુભાઈ જોધાણી, હરિવલ્લભ ભાયાણી, પુષ્કર ચંદરવાકર, દુલેરાય કારણી, ચીમનલાલ ભટ્ટ, સુધાબહેન ર. દેસાઈ, પી. સી. પરીખ. હરિલાલ કા. મોઢા.
પ્રકાશક : ગુજરાત લોકસાહિત્ય સમિતિ, અમદાવાદ
વર્ષ : 1968

angothDi wisri re