રેખ્તા
હિન્દવી
સૂફીનામા
રાજસ્થાની
આંબો
aambo
કિયા ભાઈને આંગણ આંબો મોરીઓ રે,
કિયા ભાઈને લળી લળી આવે છાય;
આંબો મોર્યો ને આંબે ફળ ઘણાં રે.
કિયા ભાઈને આંગણ રુડા ઘોડલા રે,
કિયા ભાઈને આંગણ હાથીડાની જોડ;
આંબો મોર્યો ને આંબે ફળ ઘણાં રે!
કિયા ભાઈને ઘેર વલેણાં ઘૂમતા રે,
કિયા ભાઈને ઘેર ભેંશુની જોડ;
આંબો મોર્યો ને આંબે ફળ ઘણાં રે!
કિયા ભાઈને મેડીએ દીવો શગે બળે રે,
કિયા ભાઈની મેડીએ અંજવાસ;
આંબો મોર્યો ને આંબે ફળ ઘણાં રે!
કિયા ભાઈના કૂવા કરે કીચૂડીયા રે,
કિયા ભાઈની વાડીયું લેરે જાય;
આંબો મોર્યો ને આંબે ફળ ઘણાં રે!
કિયા ભાઈને ધોળીડા બળદીયા રે,
કિયા ભાઈની ફૂમતિયાળી રાશ;
આંબો મોર્યો ને આંબે ફળ ઘણાં રે!
કિયા ભાઈના કુંવર પોઢ્યા પારણે રે,
કિયા ભાઈની કુંવરી હાલાં ગાય;
આંબો મોર્યો ને આંબે ફળ ઘણાં રે!
કઈ વહુને ફૂલફગરનો ઘાઘરો રે,
કયી વહુને ઓઢણ આછાં ચીર;
આંબો મોર્યો ને આંબે ફળ ઘણાં રે!
સ્રોત
- પુસ્તક : ચાંદો ઊગ્યો ચોકમાં (પૃષ્ઠ ક્રમાંક 7)
- સંપાદક : દોલત ભટ્ટ
- પ્રકાશક : ગુજરાત સાહિત્ય અકાદમી
- વર્ષ : 1988