સોપારીના ઝાડ પ્રતિ – અન્યોક્તિ

ઊંચું ઊંચું વધી શોભે એ થકી છે નીચાં સારાં,

જે થકી પોષણ સદા થાય છે સંસારીનું;

આપે બખશીશ બની રંજનને રાજી કરે,

વણિકનું દાન જેવું તાળીની તૈયારીનું;

આશ્રય કરીને કોઈ પ્રાણી ન આરામ પામે,

દાખે દલપત્ત પેખો ઝાડ આ સોપારીનું;

સ્રજ્યું તોય ઠીક છે ન સ્રજ્યું હોત તોય ઠીક,

જેને ફળે પેટ ન ભરાય નર નારીનું.

સોપારી કહે છે કવિ કાં મને ધિક્કાર કરે,

મને તો સ્રજી છે મીજલસને શોભાવવા;

મારા વિના વરઘોડા સારા કેમ શોભત ને,

કેને તમે કહેત સાજનમાં સિધાવવા;

મોટાં મોટાં સુંદર છે મંદિર અમારાં એથી,

શહેર શોભે છે સારાં પ્રેમ ઉપજાવવા;

તાડ ઝાડતણી તુલ્ય નથી દલપતરામ,

સારે સમે છીએ ઉપયોગ યોગ્ય આવવા.

Sopari Na Zad Prati - Anyokti