(ઉપજાતિ છંદ)

અરે રુડો માનવ દેહ આવ્યો, બહુ પ્રતાપી પ્રભુએ બનાવ્યો.

તમે વિચારો હિત જો તમારું, કરો કરો કાંઇક કામ સારું.

ન કાઢશો કાળ કદી નકામો, પરોપકારી શુભ નામ પામો;

ઠગાઈથી નામ ઠરે નઠારું, કરો કરો કાંઇક કામ સારું.

સુકીર્તિનો સ્વાદ સદૈવ ચાખો, આ લોકમાં નામ અખંડ રાખો;

તો વાગશે નિર્ભયનું નગારું, કરો કરો કાંઇક કામ સારું.

હેતે કરો પુણ્ય પવિત્ર હાથે, હાથે કર્યું તે જ સદૈવ સાથે;

બીજું નહીં એક મળે બુઝારું, કરો કરો કાંઇક કામ સારું.

જરે કરી ઉન્મદતા ન આણો, જરે કરીને નહિ શ્રેષ્ઠ જાણો;

જરે કરીને ન રમો જુગારું, કરો કરો કાંઇક કામ સારું.

આયુષ્યમાંથી પળ ઓછિ થાય, મહામુલી તે નહિ મેળવાય;

જરૂર આ જીવન છે જનારું. કરો કરો કાંઇક કામ સારું.

મહીપતીઓ પણ રાજ્ય મેલી, ખપી ગયા ભૂ પર ખેલ ખેલી;

વિશેષ શું વર્ણન હું વધારું, કરો કરો કાંઇક કામ સારું.

નથી નથી નિશ્ચલ દ્રવ્ય દેહ, નથી નથી નિશ્ચલ નારિનેહ;

અંતે થશે તે સઘળું અકારું, કરો કરો કાંઇક કામ સારું.

મનુષ્યકાયા નથિ મોજ માટે, ઘડી નથી તે પશુપક્ષિ ઘાટે;

અખંડ સ્વર્ગે સુખ આપનારું, કરો કરો કાંઈક કામ સારું.