મન વાળવા વિષે (ફાર્બસ વિરહ)

(મનહર છંદ)

અરે જીવ બન્યું જગજીવને બનાવ્યું જેમ,

તેનો પરિતાપ કીધે પાપ ફળ ફળશે;

કીધાથી હમેશ ક્લેશ વેદના વિશેષ થશે,

કાંતો તારૂં કાળજું ટકાવમાંથી ટળશે;

તે માટે તું તજ શોક, ભજ તું ત્રિલોકનાથ,

ફારબસ મિત્ર ફરી મોક્ષ મધ્યે મળશે;

ગયાં એટલાં વરસ વયનાં ગુમાવાં નથી,

જો તું કાળ વેગ કાળ જલદી નિકળશે.

(દોહરા)

પ્રીત કરી સુખ પામવા, ઉપજ્યો ખેદ ખચીત;

પ્રીત ન કરશો કોઈશું, પ્રીત રીત વિપરીત.

વિનાશવાળી વસ્તુ જે, તે સાથે શો સ્નેહ,

સદા ગયા પછી સાંભરે, દિન દિન દાઝે દેહ.

(સોરઠા)

મહા રોગની રીત, પ્રીત વિષે પ્રત્યક્ષ છે;

કોઈ ન કરશો પ્રીત, પ્રીત કરે દુખ પ્રાણને.

જન સઘળા જોનાર, જે અંબે અંબે કહે;

કરે સતી પોકાર, શબ્દ કોણ તે સાંભળે.

man vaalvaa vishe (Farbas Virah)