ઝંખના-બસસ્ટોપ પર

ઝંખના-બસસ્ટોપ પર

એક સપનું આવશે ને એય છાનું આવશે

જેમાં કારણ ચાહવા માટે સજાનું આવશે.

ઝાંઝવાં ફંફોસવા પાંપણ ઉઘાડી શોધતાં

આંખમાં આંસુનું છૂપું ચોરખાનું આવશે.

પૂર્વજન્મોની કથાના તાંતણા સાંધો હજુ

ત્યાં અધૂરું જિંદગીનું કોઈ પાનું આવશે.

નામ તો મારું લખેલું બારણાં ઉપર હશે

ઘર ખરું જોવા જશો તો ત્યાં વ્યથાનું આવશે.

ઝંખના – બસસ્ટોપ પર, છેડે પ્રતીક્ષા-માર્ગના

ત્યાં જઈને પણ તને શોધ્યા જવાનું આવશે

આપણે ભીંજાઈ જાવાનું વિચાર્યું ત્યાં ફરી

ઝાપટું વરસી ગયાનું એક બ્હાનું આવશે...

jhankhna basastop par