જગત જ્યારે જ્યારે કનડતું રહે છે

જગત જ્યારે જ્યારે કનડતું રહે છે,

મને કંઈક મારામાં જડતું રહે છે.

છે દિલ પર અસર શેનાં આકર્ષણોની?

નથી ઢાળ તો પણ ગબડતું રહે છે.

પડે જેમ ખુશબૂનાં પગલાં હવામાં,

કોઈ એમ મારામાં પડતું રહે છે.

રહી દૂ...ર કોઈ રહે ઠે...ઠ ભીતર,

રહી પાસે કોઈ, અછડતું રહે છે.

આ મન છે કે માણેકશાની ચટાઈ?

બને દહાડે, રાતે ઊખડતું રહે છે.

આ વાતાનુકૂલિત મકાનોની પાછળ,

જરઠ ઝાડ કંઈ-કંઈ બબડતું રહે છે.

હથેળીની ભાષા અડી ગઈતી ક્યારેક,

કબૂતર હજી પણ ફફડતું રહે છે.

jagat jyare jyare kanaDatun rahe chhe