રેખ્તા
હિન્દવી
સૂફીનામા
રાજસ્થાની
હવાઓ
hawao
રમેશ પારેખ
રમેશ પારેખ
ગજરો સુગંધોનો ઝાલી હવાઓ
ફરે હાથમાં હાથ ઘાલી હવાઓ
પગો વૃક્ષની ડાળે બેસી ઝુલાવે
ને મર્મરની પીવે છે પ્યાલી હવાઓ
વિચારોનાં સૂમસામ મેદાન સાથે
કરે વાત કૈં કાલી-કાલી હવાઓ
સરોવરને ઓઢી સૂતેલી લહરને
જગાડે જઈ ખાલી-ખાલી હવાઓ
કરે કાન પકડીને ઊઠ-બેસ તૃણો
ને નીરખીને પાડે છે તાલી હવાઓ
એ પોતે જ દોડે છે પોતાની પાછળ
રમે એકલી સાતતાલી હવાઓ
પીળાં પર્ણની બેડીઓ રહી ખખડતી
અને આંખ આંજીને ચાલી હવાઓ
સ્રોત
- પુસ્તક : ક્યાં (પૃષ્ઠ ક્રમાંક 74)
- સર્જક : રમેશ પારેખ
- પ્રકાશક : આદર્શ પ્રકાશન
- વર્ષ : 2007
- આવૃત્તિ : પુનર્મુદ્રણ