રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો

રજિસ્ટ્રેશન કરો

વૃત્તગઝલ

રમેશ પારેખ

વૃત્તગઝલ

રમેશ પારેખ

ધીરે ધીરે સતત સપનાં ખૂટવાની કથા છે

આંખો શું છે, બસ તરડ છે, તૂટવાની કથા છે

કોને કોની સરહદ ગ્રસી જાય છે એ પૂછો મા

શ્રદ્ધા આખ્ખા નગર પરથી ઊઠવાની કથા છે

ઝોબો આવે જડભરત આ શ્વાસને કોઈવાર

બાકી આ તો અઢળક પીડા ઘૂંટવાની કથા છે

આંખોને અંગત પગરખા જેવું આંસુ મળ્યું’તું

તેને આ કંટક-નગરમાં લૂંટવાની કથા છે

આપી જેને બચપણ અમે વેદના આ લીધી છે

એ કાળાપથ્થર સમયથી છૂટવાની કથા છે

આ બાજુ જંગલદહન દેમાર ચાલુ, રમેશ

આ બાજુ કૂંપળ અવનવી ફૂટવાની કથા છે.

સ્રોત

પુસ્તક : છ અક્ષરનું નામ (પૃષ્ઠ ક્રમાંક 349)
સર્જક : રમેશ પારેખ
પ્રકાશક : પ્રવીણ પબ્લિકેશન
વર્ષ : 2014
આવૃત્તિ : 6