વૃક્ષ પડે છે ત્યારે

વૃક્ષ પડે છે ત્યારે

શું વીતે છે આભ, ધરા પર, વૃક્ષ પડે છે ત્યારે

વ્યાકુળ થઈ જાતું સચરાચર વૃક્ષ પડે છે ત્યારે

ટહુકાઓ પણ દિશા ભૂલી, અફળાતા ચારે બાજુ

રૂદન કરે છે પંખીના સ્વર, વૃક્ષ પડે છે ત્યારે

થોડી ઝાઝી અસર થવાની સંવેદન પર સહુના

માણસ હો કે હો એ પથ્થર, વૃક્ષ પડે છે ત્યારે

એમ મને લાગે કે ઓછું થયું કશું મારામાં

હું પણ તૂટું મારી અંદર, વૃક્ષ પડે છે ત્યારે

કોરી પાટી જેવી ધરતી નીરખો તો સમજાશે

ભૂંસાતા ઈશ્વરના અક્ષર, વૃક્ષ પડે છે ત્યારે

vruksh pade chhe tyare