સુગંધે કહ્યું છે ઘણું ખાનગીમાં

સુગંધે કહ્યું છે ઘણું ખાનગીમાં

ન કહેવાય જે ફૂલની હાજરીમાં

હતી એને જાતે જ ઉપાડવાની

અમુક તેથી બેસી શક્યા પાલખીમાં

મને તો એ કળીઓ જ નાસ્તિક લાગી

જે જાતે ફસાઈ રહી છાબડીમાં

પડી એને લત આંગળી વીંધવાની

પછી કાટ લાગી ગયો ટાંકણીમાં

મિનારાથી ફેંકાતી નારીનું આક્રંદ

કડાકા અમસ્તા નથી વીજળીમાં

નથી તારલા, ચંદ્ર, સૂરજ કે અગ્નિ

મરણ લઈને આવ્યું કઈ રોશનીમાં

બને તો કફન આરવાળું ચઢાવો

કરચલી મળી છે ઘણી જિંદગીમાં

sugandhe kahyun chhe ghanun khangiman