રેખ્તા
હિન્દવી
સૂફીનામા
રાજસ્થાની
વતન હતું
vatan hatu
મહેન્દ્ર 'સમીર'
મહેન્દ્ર 'સમીર'
જેને કહી રહ્યા છો ગગન એ ચમન હતું,
અમ બુલબુલોનું એ કદી પ્યારું વતન હતું.
ને તારલાઓ જેમને કહેતા રહ્યા તમે,
એકેક અમ ચમનનું ભલા એ સુમન હતું.
આદિ ને અંત એક હતાં જિંદગી મહીં,
ના કો’ ધરા હતી અને ના કો’ ગગન હતું.
ના કોઈ યુગ હતો ન વળી કો ક્ષણ હતી,
જ્યાં ખુદ સમય તણું ન કો’ આવાગમન હતું.
સાકી અમે જ, જામ અમે, મય-સદન અમે,
કૌસરની ઘૂંટથી જ ઘડ્યું તનબદન હતું.
સૈયદ ખુદ અમે જ હતા, બાગબાં અમે,
કીધું ધરા પ્રયાણ તે પહેલું પતન હતું.
જેને ધરા કહે છે તસવ્વુર ‘સમીર’ એ,
માનવ અનાદિ-કાફલાનું કૈં મનન હતું.
સ્રોત
- પુસ્તક : મધુવન (પૃષ્ઠ ક્રમાંક 191)
- સંપાદક : હરીન્દ્ર દવે
- પ્રકાશક : પ્રવીણ પુસ્તક ભંડાર
- વર્ષ : 2002