વહેવાર વિશ્વનો છે જીવનના વલણ સુધી

વહેવાર વિશ્વનો છે જીવનના વલણ સુધી,

છે દુશ્મની કે દોસ્તી મારા મરણ સુધી.

આવ્યા છો મારી પાસ તમે એ નવાઈ છે,

નહીંતર નદી જતી નથી નાના ઝરણ સુધી.

ભીતરના ભેદ કોઈ ઉકેલી શક્યું નહીં,

પ્હોંચી'તી આમ સૌની નજર આવરણ સુધી.

એના વિચાર માત્રથી ધડકન વધી ગઈ,

શું થાશે દિલનું પ્રેમના પ્રકટીકરણ સુધી.

હું 'રાઝ' જિંદગીને સમજવાને જઉં છું,

કબરોની આસપાસના વાતાવરણ સુધી.

vahevaar vishvno chhe jivanna valan sudhii