વહેતા પવનની ત્યારે વિમાસણ વધી હશે

વહેતા પવનની ત્યારે વિમાસણ વધી હશે,

દરિયામાં તારું નામ તરંગો બની જશે.

સ્પર્શે છે કોઈ, તોય ન આંખો ઉઘાડતો,

કોઈ અવર જો હોય તો શમણાનું શું થશે?

હસતો રહું છું, વાત કરું છું અલપઝલપ,

જો ચૂપ રહું તો ભય કે તું એ વાત પૂછશે.

શબ્દોમાં ઘૂંટતો રહું તારા વિરહનો કેફ,

ચકચૂર જો બનું તો મુલાકાત થૈ જશે.

હમણાં તો ‘આવજો’ કહી છૂટા પડ્યા હતા,

હમણાં જ આવી જાઉં તો તું આવકારશે?

vahetaa pavannii tyaare vimaasan vadhii hashe