રેખ્તા
હિન્દવી
સૂફીનામા
રાજસ્થાની
હોત તો!
hot to!
કિશોર જીકાદરા
કિશોર જીકાદરા
એમ આગળિયો તમે ઝટપટ ન વાસ્યો હોત તો,
ખત તમે ફાડ્યો તરત, એ પૂર્ણ વાંચ્યો હોત તો!
વાદળોની કેફિયત વિસ્તારથી જાણી લીધી,
મોકળાશે પક્ષ ચાતકનોય જાણ્યો હોત તો!
રોજ થોડું એ જગાથી વસ્ત્ર ચિરાતું રહ્યું,
નાનકો ખાંપો તમે ત્યારે જ સાંધ્યો હોત તો!
વાયરાની પીઠ કાયમ થાબડી કારણ વગર,
કોક દી આભાર ખુશ્બૂનોય માન્યો હોત તો!
આંખથી લીધેલ અંદાજોય ખોટા થઈ શકે,
બથ ભરી છપ્પન પનો, જાતે જ માપ્યો હોત તો!
ભીડ જેવું સ્હેજ પણ લાગત નહીં ઘરમાં પછી,
પાંજરું રાખ્યા વિના ટહુકો જ પાળ્યો હોત તો!
સાવ સીધા માર્ગ પર એ ક્યાં લગી ચાલ્યા કરે,
વારતાને ક્યાંક સુંદર મોડ આપ્યો હોત તો!
સ્રોત
- પુસ્તક : પાંપણ વચ્ચે (પૃષ્ઠ ક્રમાંક 44)
- સર્જક : કિશોર જીકાદરા
- પ્રકાશક : રન્નાદે પ્રકાશન
- વર્ષ : 2019