વાત મારી જેને સમજાતી નથી

વાત મારી જેને સમજાતી નથી,

એ ગમે તે હોય, ગુજરાતી નથી.

ગૂંજ તો ખુશબૂની પ્રસરે છે બધે,

ફૂલની રંગત ગઝલ ગાતી નથી.

એ જ મહેફિલ, એ જ મિત્રો, એ જ રંગ,

'હું નથી'ની ખોટ વર્તાતી નથી.

મેં રખડવું ક્યારનું છોડ્યું છતાં,

પણ હજી એ છાપ ભૂંસાતી નથી!

લાગણીના ધોધ વરસે છે બધે,

પણ કોઈની રૂહ ભીંજાતી નથી.

ભૂખ પણ બિન્દાસ્ત થાતી જાય છે,

એ ગમે ત્યાં હોય શરમાતી નથી!

પ્રેમની પણ યોજનાઓ થાય છે,

એટલે તો પ્રીત પંકાતી નથી.

ભાવ ઓછો કર ખલીલ! આ ભાવમાં

ભલભલી ચોપડીઓ વેચાતી નથી.

vaat maarii jene samjaatii nathii