વાદળો ગરજે ઊભા રહેવું પડે

વાદળો ગરજે ઊભા રહેવું પડે;

આપણી તરસે ઊભા રહેવું પડે.

એમનાં દર્શન જો કરવાં હોય તો,

એમના રસ્તે ઊભા રહેવું પડે.

હોય છો ને વાત ખોટી કે ખરી,

દોસ્તની પડખે ઊભા રહેવું પડે.

મીણબત્તી ને જીવનમાં સામ્ય શું?

જાત છો સળગે ઊભા રહેવું પડે.

કોઈને જો આપવો હો છાંયડો,

આપણે તડકે ઊભા રહેવું પડે.

પાણીમાં બેસી જવું પોસાય નહિ,

કોઈ પણ શરતે ઊભા રહેવું પડે.

દૂર એકલતાને કરવા આપણે,

આપણી ફરતે ઊભા રહેવું પડે.

vaadlo garje uubhaa rahevun pade