રેખ્તા
હિન્દવી
સૂફીનામા
રાજસ્થાની
ઉપમા હું નહીં આપું
upamaa hun nahiin aapu
તૌફિક 'પ્રીતમ'
તૌફિક 'પ્રીતમ'
તિમિરમય રાતને કાજળની ઉપમા હું નહીં આપું,
જીવનના શૂળને બાવળની ઉપમા હું નહીં આપું.
હૃદય-જંગલ મહીં નિશ્ચય ભયંકર આગ લાગી છે,
છે ઠંડી આગ, દાવાનળની ઉપમા હું નહીં આપું.
છે મારાં અશ્રુમાં સૌરભ ભળી કોઈનાં સ્મરણોની,
શું કે'શે લોક જો શતદલની ઉપમા હું નહીં આપું?
કોઈના રૂપનાં ઓજસ કોઈથી ક્યારે સમજાશે?
યદિ આ પુષ્પ ને ઝાકળની ઉપમા હું નહીં આપું!
રૂપક સુંદર છે કિન્તુ એમની ફોરમનું શું થાશે?
તમારા કેશને વાદળની ઉપમા હું નહીં આપું.
યદિ સૌંદર્ય તારું સાંપડી જાયે મને, ‘પ્રીતમ!'
જીવનને ઝાંઝવાંનાં જળની ઉપમા હું નહીં આપું.
સ્રોત
- પુસ્તક : મધુવન (પૃષ્ઠ ક્રમાંક 114)
- સંપાદક : હરીન્દ્ર દવે
- પ્રકાશક : પ્રવીણ પ્રકાશન
- વર્ષ : 2002
- આવૃત્તિ : ચોથી આવૃત્તિ