રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો
રજિસ્ટ્રેશન કરો
રેખ્તા
હિન્દવી
સૂફીનામા
રાજસ્થાની
બોલો
bolo
હર્ષ બ્રહ્મભટ્ટ
હર્ષ બ્રહ્મભટ્ટ
નામ લેતાં એનું અટકી જાય છે, બોલો.
એક પાગલને બધું સમજાય છે, બોલો.
ઈશ્વરે એ ગામ છોડ્યાને થયાં વરસો,
ત્યાં પૂજારીઓ હવે પૂજાય છે, બોલો.
આમ વરસોથી નથી ઊંઘ્યો હકીકત છે,
આમ એ સપના સમો દેખાય છે, બોલો.
કોઈ દરજી માપ લઈ શકતો નથી એનું,
એ સતત નાનો ને મોટો થાય છે, બોલો.
દર વખત લો, લક્ષ્ય પોતે તાળીઓ પાડે,
જેટલી પણ વાર એ વીંધાય છે, બોલો.
એ બધાથી સાવ નોખો ને અલગ તોપણ,
એકસરખો સર્વમાં વ્હેંચાય છે, બોલો.
સ્રોત
- પુસ્તક : આભ દોર્યું તો સૂર્ય ઊગ્યો'તો (પૃષ્ઠ ક્રમાંક 15)
- સર્જક : હર્ષ બ્રહ્મભટ્ટ
- પ્રકાશક : નવભારત સાહિત્ય મંદિર
- વર્ષ : 2015