ઉનાળા લાગે છે

ઉનાળા લાગે છે

છલકાય છે આંસુ આંખોથી હૈયામાં જ્વાળા લાગે છે;

વર્ષોની શીતળતામાં જાણે ધગધગતા ઉનાળા લાગે છે.

ચાલું છું ભલે ને કાંટા પર માણું છું મજા હું ફૂલોની;

જો પ્રેમ હો સાચો દિલમાં તો વિઘ્નોય સુંવાળા લાગે છે.

દુનિયા તો ઝાલિમ સમજે છે દિલ એને કૃપાઓ માને છે;

દોષિત એ હશે માન્યું કિન્તુ! નિર્દોષ રૂપાળા લાગે છે.

દુ:ખ-દર્દના કપરા દહાડાઓ ગુજરે તો ગુજરે શી રીતે?

આ વિરહ મિલનની ઘડીઓના કંઈ લાંબા ગાળા લાગે છે.

આ મનહર મનહર તારલિયા નભમંડળમાં છે વેરવિખેર;

કો' સ્વર્ગ-પરીની ગ્રીવાથી ટુટેલી માળા લાગે છે.

હું જ્યારે દુઃખી થઈ જાઉં છું એ શલ્ય મને બહેલાવે છે;

ઉર-આશ અવિરત જીવનમાં કિલ્લોલતી બાળા લાગે છે.

unaalo laage chhe