તું ડગ ભરવાની હિંમત કર, ઊતરતા ઢાળ જેવો છું

તું ડગ ભરવાની હિંમત કર, ઊતરતા ઢાળ જેવો છું,

મનાવી લે મને, હું સાવ નાના બાળ જેવો છું.

આ દરિયાની ગહનતા માપવાનું સાવ છોડી દે,

તું મારામાં ઊતર, હું સાતમા પાતાળ જેવો છું.

મને માણી જો પારાવાર શીતળતાના સંદર્ભે,

હું કડવો છું પરંતુ લીમડાની ડાળ જેવો છું.

તમારા આરા-ઓવારા બધા છે મારી મુઠ્ઠીમાં,

સરોવર છો તમે તો હું સરોવરપાળ જેવો છું.

હવે ભાષાભવનના સૌ કુબેરોને કહી દેજો,

તમે છો શબ્દભંડારી તો હું ટંકશાળ જેવો છું.

tun dag bharvaanii hinmat kar, utartaa dhaal jevo chhun