થીજેલા એક પર્વતને પીગળવાનું થયું પાછું

થીજેલા એક પર્વતને પીગળવાનું થયું પાછું,

ફરીથી એ જ રસ્તેથી નીકળવાનું થયું પાછું.

બુઝાવ્યો છે મને મેં કેટલાં વર્ષો વિત્યાં પહેલાં,

કઈ તૃષ્ણાના તણખાથી સળગવાનું થયું પાછું?

મને દરિયા તણું મોજું સમજશો તો સરળ પડશે,

ત્યજેલા એ કિનારાને વળગવાનું થયું પાછું.

સ્મરણની આંગળી પકડીને નીકળ્યું છે હઠીલું મન,

કશા કોઈ ખાસ કારણથી રઝળવાનું થયું પાછું.

શિરસ્તો છે અજબ આ પ્રેમનો સમજણ નથી પડતી,

સ્વયં જ્યાં જાતની સાથે ઝઘડવાનું થયું પાછું.

ગઝલ, વરસાદમાં કોરા રહ્યાનો વસવસો ના કર,

અહીં ઘરની ભીતર પણ, લ્યો, પલળવાનું થયું પાછું.

thijela ek parwatne pigalwanun thayun pachhun