tame aaghaa khaso to ketlo lambaay chhe rasto - Ghazals | RekhtaGujarati

તમે આઘા ખસો તો કેટલો લંબાય છે રસ્તો

tame aaghaa khaso to ketlo lambaay chhe rasto

ભીખુભાઈ ચાવડા 'નાદાન' ભીખુભાઈ ચાવડા 'નાદાન'
તમે આઘા ખસો તો કેટલો લંબાય છે રસ્તો
ભીખુભાઈ ચાવડા 'નાદાન'

તમે આઘા ખસો તો કેટલો લંબાય છે રસ્તો

નિકટ આવો તો આંખોમાં સમાતો જાય છે રસ્તો

તમે ચેતાવતા રહો છો છતાં પણ ઠેશ વાગે છે

તમે સામે હો ત્યારે ક્યાં મને દેખાય છે રસ્તો

કહો આપણા સંબંધની ના કઈ રીતે કહેશો?

કે મારે ત્યાંથી નીકળી આપને ત્યાં જાય છે રસ્તો

તમારો સોબતી છે એ, તમે ટેવ પાડી છે :

નજરથી દૂર જઈને એટલે સંતાય છે રસ્તો

જતો'તો એમને ત્યાં, રીતે સામા મળ્યા તેઓ

પૂછીપૂછીને પૂછાયું કે ક્યાં જાય છે રસ્તો

જતું રહેવું તમારું પગ પછાડીને જતું રહેવું

અહીં હું ખાલીખમ બેઠો અને પડઘાય છે રસ્તો

પ્રતીક્ષા નહિ કરો તો પણ કરવાની ફરજ પડશે

જુઓ 'નાદાન' બારીમાંથી ખુદ ડોકાય છે રસ્તો

સ્રોત

  • પુસ્તક : રજ રજ અચરજ
  • સર્જક : ભીખુભાઈ ચાવડા 'નાદાન'
  • પ્રકાશક : વિશાલ પબ્લિકેશન્સ
  • વર્ષ : 2001