તમારે પાંખ વિનાનું એ પંખી દોરવું પડશે
tamaare paankh vinaanun ae pankhii dorvun padshe

તમારે પાંખ વિનાનું એ પંખી દોરવું પડશે
tamaare paankh vinaanun ae pankhii dorvun padshe
ભરત ભટ્ટ 'તરલ'
Bharat Bhatt 'Taral'

તમારે પાંખ વિનાનું એ પંખી દોરવું પડશે,
અને દોર્યા પછી રંગો પૂરી ઉડાડવું પડશે.
તમારી આંખ સપનાનાં ઝરણને ઝૂરતી રહેશે,
તમારે એક ટીપું ઊંઘ માટે જાગવું પડશે.
હવે હોડી નથી, દરિયો નથી, કંઈ પણ નથી અડચણ;
હવે અવકાશના કોરા કળણમાં ખૂંપવું પડશે.
ફુલાવીને તમે ફોડયા ફિકરના કૈંક ફુગ્ગાઓ,
હવે એ ફૂંકને ફુગ્ગાની માફક ફૂટવું પડશે.
તમે તત્ત્વો-પદાર્થો તોડતા સંયોજતા સંજ્ઞા,
તમારા તર્કને તડતડ તડડ તડ તૂટવું પડશે.



સ્રોત
- પુસ્તક : ગઝલશતક (પૃષ્ઠ ક્રમાંક 48)
- સંપાદક : હર્ષદ ત્રિવેદી
- પ્રકાશક : ગુજરાત સાહિત્ય અકાદમી
- વર્ષ : 1999