પગલાં તળાવમાં

પગલાં તળાવમાં

થીજી ગયું છે એય પણ તારા અભાવમાં;

લોહી હવે વ્હેતું નથી એકેય ઘાવમાં.

કાંઠાઓ રોઈ રોઈને જળને પૂછી રહ્યા :

ભૂલી ગયું છે કોણ આ પગલાં તળાવમાં?

બત્રીસ ગુણની લાગણીનો ભોગ દઈ દીધો,

છલકાયું ત્યારે નીર આ આંખોની વાવમાં.

મંદિર વચોવચ એક માણસની થઈ કતલ,

ઈશ્વર છતાં આવ્યો નહીં એના બચાવમાં.

‘બેદિલ’ અરીસો આટલું કહીને ફૂટી ગયો,

મારાપણાની છે ઊણપ મારા સ્વભાવમાં.

(૧૨-૧૦-૨૦૦૦)

pagla talavmaa