રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો
રજિસ્ટ્રેશન કરો
રેખ્તા
હિન્દવી
સૂફીનામા
રાજસ્થાની
લીલુંછમ
lilunchham
જયન્ત પરમાર
જયન્ત પરમાર
ભીની કબરના હાથમાં ફૂલો મૂકી ગયું,
આ કોણ મારા ઘાવને તાજા કરી ગયું?
નીકળી ગયો એ કાંટો હવે કૈંક ચેન છે,
મિસરો કહ્યોને શબ્દમાં દુ:ખ પણ ઢળી ગયું.
કોઈ નથી મકાનમાં કોઈ નથી છતાં,
આ કોણ અંધકારમાં બત્તી કરી ગયું?
કાંઠા ઉપર સુકાયેલાં પગલાં હતાં ‘જયંત’
મૂંગૂં તળાવ કોણ લીલુંછમ કરી ગયું ?
સ્રોત
- પુસ્તક : ગઝલશતક (પૃષ્ઠ ક્રમાંક 25)
- સંપાદક : હર્ષદ ત્રિવેદી
- પ્રકાશક : ગુજરાત સાહિત્ય અકાદમી
- વર્ષ : 1999