તારી યાદ આવે અને હું રાતભર જાગ્યા કરું

તારી યાદ આવે અને હું રાતભર જાગ્યા કરું,

કઈ હવા લઈ આવશે તારી ખબર? જાગ્યા કરું.

એ વિમાસણ છે કે તારી આંખ મીંચાતી હશે?

ઘેનમાં જ્યારે છે આ આખું નગર, જાગ્યા કરું.

ના મિલનનો કોલ છે કે ના વિરહની વેદના,

આ તે કેવું છે કે હું કારણ વગર જાગ્યા કરું.

‘કેમ ચાલે છે?’ ‘બધું સારું છે’ કહી છૂટાં પડ્યાં,

આ અમસ્તી વાતની કેવી અસર, જાગ્યા કરું.

રાતના સૂરજ ઊગે તો કંઈકે શોષાઈ શકે,

આંખ ઝાકળથી થઈ છે તરબતર, જાગ્યા કરું.

taarii yaad aave ane hun raatbhar jaagyaa karun