સુખ વિશે જ્યાં હેસિયતની બ્હાર બોલ્યો

સુખ વિશે જ્યાં હેસિયતની બ્હાર બોલ્યો,

સ્વપ્ન જુએ છે? તરત અંધાર બોલ્યો.

કોઈ ના માન્યું, વધારે સાવ બગડ્યું,

હા, ઘણી વેળા થયું બેકાર બોલ્યો.

લાગણી સ્પર્શી અને મૂંગી રહી ગઈ,

આવડે એવું બધું વ્યવહાર બોલ્યો.

કેટલાં વરસો ગયાં ભૂંસવામાં,

ક્રોધમાં જે શબ્દ હું બે-ચાર બોલ્યો.

ખૂબ ઊંડી છે કહી સહુએ વધાવી,

વાત મામૂલી અગર વગદાર બોલ્યો.

એક વેળા સાંભળ્યું મેં આત્માનું,

ત્યારથી વચ્ચે એ વારંવાર બોલ્યો.

sukh wishe jyan hesiyatni bhaar bolyo