સૂરજના પક્વ ફળ થકી બેસ્વાદ રસ પડ્યો

સૂરજના પક્વ ફળ થકી બેસ્વાદ રસ પડ્યો,

જાગો અતૃપ્ત જીવ, કે ટપકી દિવસ પડ્યો.

પકડાઈ ચાલ્યાં પાનથી ઝાકળનાં પંખીઓ;

કિરણોના પારધીને ફરીથી ચડસ પડ્યો.

વાવ્યા વિના લણાયો રણે ઝાંઝવાંનો પાક;

બોલ્યા વિના બપોરનો પડઘો સરસ પડ્યો.

માટીને મ્હેકવાની ગતાગમ નથી હજી;

વરસાદ આંગણા મહીં વરસોવરસ પડ્યો.

અંધાર આવું આવું કરે બારી બા’રથી;

પીળો પ્રકાશ ખંડમાં હાંફે ફરસ - પડ્યો.

સૂરજના મનના મેલ નિશાએ છતા થયા;

ઓજસનો ધોધ કાખમાં લઈને તમસ પડ્યો.

કાંઠાનો સાદ સાંભળ્યો તળિયે અમે 'ગની',

'કોઈ અભાગી જીવ લઈને તરસ પડ્યો.'

suurajnaa pakva phal thakii besvaad ras padyo