સૂકાયલી નદીમાં ચરણ બોળતી બપોર

સૂકાયલી નદીમાં ચરણ બોળતી બપોર

જંપી ગયેલ કાળનાં જળ ડો'ળતી બપોર

ગુલમ્હોરના સરોવરે નાહ્યા કરે નજર

પીળાં સ્મરણની પીઠી પછી ચોળતી બપોર

રેલી રહ્યાં છે કેટલાં મૃગજળ ક્ષિતિજ ઉપર

ખાલી ઘડાને હર પળે ત્યાં ઢોળતી બપોર

લીમડાની લીલી મ્હેકને પ્હેરી હવા ફરે

ત્યાં તો કૂંપળની જેમ કશી કૉળતી બપોર

પડછાયા વૃક્ષનાય હવે ઓગળી રહ્યા

સૂતેલી વેદનાઓને ઢંઢોળતી બપોર

suukaylii nadiimaan charan boltii bapor