મિલનની કોઈ પણ સંભાવનામાં વહેંચી દે

મિલનની કોઈ પણ સંભાવનામાં વહેંચી દે

તું કોઈ રીતે મને ઝંખનામાં વહેંચી દે

મેં અંધકારને પીધો છે, ખૂબ પીધો છે

કે સૂર્ય જેવી કોઈ ધારણામાં વહેંચી દે

આ જડ પદાર્થમાંય ચેતના ખીલી ઊઠે

છલકતી જાય જે એવી સુરામાં વહેંચી દે

તણાતો જાઉં છું કોઈ અકળ પ્રવાહ વિશે

તું એને વાંછના કે વાસનામાં વહેંચી દે

અજાણ્યા દેશનો એકલ પ્રવાસી છું, તું મને

ગમે તે રાહ, ગમે તે દિશામાં વહેંચી દે

આ મારા લેહીમાં સંદર્ભ શાનો થરકે છે

તુ નામ આપ અને નામનામાં વહેંચી દે

ગઝલના જેવી આ ઇચ્છા જે ટળવળે છે 'હનીફ'

સફેદ કાગઝી સંવેદનામાં વહેંચી દે

milanni koi pan sambhawnaman wahenchi de