રેખ્તા
હિન્દવી
સૂફીનામા
રાજસ્થાની
કોઈ તારી વાતો કરે છે હજી,
હરણ ઝાંઝવામાં તરે છે હજી.
સરોવરમાં પાછું કમળ ખીલશે,
ભ્રમર આત્મહત્યા કરે છે હજી.
હવે જંગલોમાં નથી પ્રાણીઓ,
છતાં માણસો ત્યાં ડરે છે હજી.
હજી ઝેર બાકી હશે દાઢમાં,
કોઈ સાપ પાછળ ફરે છે હજી.
હજી હાથમાં કૈંક કૌવત હશે,
કે કોઈ દુઆઓ કરે છે હજી.
પવનની દિશા આજ બદલાઈ ગઈ,
છતાં પાંદડું ફરફરે છે હજી.
નથી વાગતી વાંસળી તે છતાં,
સ્મૃતિઓનું ધણ તો ચરે છે હજી.
સ્રોત
- પુસ્તક : સાનિધ્ય (પૃષ્ઠ ક્રમાંક 101)
- સર્જક : સતીષ ‘નકાબ’
- પ્રકાશક : સુમન પ્રકાશન
- વર્ષ : 1988