શું બતાવું કેવા કેવા જોઉં છું

શું બતાવું કેવા કેવા જોઉં છું.

રોજ દુનિયાના તમાશા જોઉં છું.

મારી આંખે તો એક જોવાતી નથી

એની આંખે એની દુનિયા જોઉં છું.

કાલે એના દિલના ઉંબરા પર હતો

આજે એના ઘરના રસ્તા જોઉં છું.

હું તો શાયર છું, ઓ મારા દોસ્તો!

જ્યારથી જન્મ્યો છું, સપનાં જોઉં છું.

એના ઘરમાં એ જ દેખાતો નથી!

રોજ એના ચાંદ તારા જોઉં છું!

સાચું કહું તો જોઉં છું એને જ હું!

લોકના ચહેરા તો અમથા જોઉં છું!

બંધ આંખે તો જુએ છે સૌ 'અદી'

હું ઉઘાડી આંખે સપનાં જોઉં છું.

shun batawun kewa kewa joun chhun