હતી નાંખી દીધા જેવી, મજાની એ મગર લાગી

હતી નાંખી દીધા જેવી, મજાની એ મગર લાગી,

ગઝલમાં વાત મૂકી એટલે એ માતબર લાગી.

ઉંમર વિતાવવામાં ખાસ્સી એક આખી ઉંમર લાગી,

ઉંમરની એટલે ચહેરા ઉપર પૂરી અસર લાગી.

ચપોચપ બંધ બેસે પાઘડી કેવી પ્રતિષ્ઠાની,

બધાંએ માથે મૂકી તો બધાંને માપસર લાગી!

શિખરને સર કરી શકશો, શિખર પર જિંદગી ક્યાં છે?

તળેટી એ જ કારણથી શિખરથી ઉચ્ચતર લાગી.

સ્મરણ પીછો ન છોડે ને હું ભાગું જીવ પર આવી,

અમારે દોટ લાગી તે પછી તો રાતભર લાગી.

hatii naankhii diidhaa jevii, majaanii ae magar laagii