સૌ ભેદને મિટાવવા તારી જરૂર છે,

તારી સમીપ આવવા તારી જરૂર છે.

હું પાત્ર તો નિભાવુ છું તારું દીધેલ દોસ્ત,

પણ પાત્રતા નિભાવવા તારી જરૂર છે.

જે જાણતો નથી એ નથી જાણવું હવે,

જાણું છું એ જણાવવા તારી જરૂર છે.

તારો થઈ જનાર બીજાનો થતો નથી,

આ સત્યને સજાવવા તારી જરૂર છે.

પકડીને તારો હાથ થવું છે બધાથી પર,

મારે કશે ક્યાં ફાવવા તારી જરૂર છે !

આ શબ્દ, ભાવ, અર્થ બધું તારી દેન છે,

બસ જ્ઞાન આ પચાવવા તારી જરૂર છે.

આ દેહ તો બુઝાઈ જશે એની રીતથી,

સંદેહને બુઝાવવા તારી જરૂર છે.