સાથ કાયમનો છતાં સહવાસ જેવું કંઈ નથી

સાથ કાયમનો છતાં સહવાસ જેવું કંઈ નથી,

સૂર્યનો આભાસ છે અજવાસ જેવું કંઈ નથી.

તેં નકાર્યું જ્યારથી રંગોભર્યા અસ્તિત્વને,

રક્તની આ દોડમાં ઉલ્લાસ જેવું કંઈ નથી.

કોઈ પણ આવી શકે ને આવીને જઈ પણ શકે,

જિંદગી છે આ દીવાનેખાસ જેવું કંઈ નથી.

જ્યાં મળ્યો છે આવકારો ત્યાં અમે રોકાઈ ગ્યા,

ગામ ઘર શેરી અને વનવાસ જેવું કંઈ નથી.

હું નથી દરિયો કે દટ્ટાયેલ મોહેં-જો-ડેરો,

હું નદીનું વ્હેણ છું ઇતિહાસ જેવું કંઈ નથી.

જે સજા ગણતો હતો તું, તે જ મુક્તિ થઈ જશે,

રહી શક્યો પળમાં તો કારાવાસ જેવું કંઈ નથી.

sath kayamno chhata sahvas jevu kai nathi