રેખ્તા
હિન્દવી
સૂફીનામા
રાજસ્થાની
સાત રંગના સરનામે
sat rangna sarname
રમેશ પારેખ
રમેશ પારેખ
સાત રંગના સરનામે ના તું આવી, ના હું આવ્યો
ના ઘર ઘડ્યા સામે સામે, ના તું આવી, ના હું આવ્યો
તું કેશ સૂકવતી રહી તડકે, હું ડૂબતો ચાલ્યો પુસ્તકમાં
બહુ વ્યસ્ત રહ્યાં અંગત કામે, ના તું આવી, ના હું આવ્યો
કેવા દુખિયારા ગર્વ વડે ખરબચડી ઉંમર પંપાળી?
શું કામ હતું બીજું આમે? ના તું આવી, ના હું આવ્યો
ના સાંજની બેઠી સોગઠીઓ, ના કોડી ઊછળી સપનાંની
ચોપાટ રમ્યાં ડામે ડામે, ના તું આવી, ના હું આવ્યો
એક વાતનું પુંકેસર તૂટ્યું, એક ડાળ તૂટી ગઈ શબ્દોની
એક મજિયારા મનના નામે, ના તું આવી, ના હું આવ્યો.
સ્રોત
- પુસ્તક : વયઃસંધિ (પૃષ્ઠ ક્રમાંક 33)
- સંપાદક : બાપુભાઈ ગઢવી
- પ્રકાશક : ગૂર્જર ગ્રંથરત્ન કાર્યાલય
- વર્ષ : 2002