રેખ્તા
હિન્દવી
સૂફીનામા
રાજસ્થાની
સરનામું
sarnamun
કાયમ હઝારી
કાયમ હઝારી
જરૂરી પ્રીતમાં ના છે પ્રીતમના ઘરનું સરનામું;
નદી ક્યાં કોઈ’દી પૂછે છે શું સાગરનું સરનામું?
સગડ જાતાં હતાં તુજ વાળ સુધી એ હવાઓના –
મેં જેને મોકલી’તી શોધવા અત્તરનું સરનામું!
મેં મારા દિલ તરફ નાંખી નજર મનમાં હસી લીધું;
મને દેતાં હતાં જ્યારે એ એના ઘરનું સરનામું!
હતી અંદરના કાગળમાં વિગત એવી કે, શંકાથી –
ઘણા પાસે મેં વંચાવ્યું લિફાફા પરનું સરનામું!
નનામો પત્ર છે દુનિયા અને આ માનવી એમાં –
યુગોથી આથડે છે શોધવા અક્ષરનું સરનામું!
તું તારી ખોજ કર ‘કાયમ’, તું તારી ખોજ કર ‘કાયમ’
કે તારું ખુદનું સરનામું જ છે ઈશ્વરનું સરનામું
સ્રોત
- પુસ્તક : આદમ ઈવનું પહેલું ચુંબન (પૃષ્ઠ ક્રમાંક 12)
- સર્જક : ‘કાયમ’ હઝારી
- પ્રકાશક : નવભારત સાહિત્ય મંદિર
- વર્ષ : 1994