રિક્તતા, ગુલમ્હોર, લીલુંછમ, લગોલગ હોય છે

રિક્તતા, ગુલમ્હોર, લીલુંછમ, લગોલગ હોય છે,

આજ ગઝલોમાં બધે આવું જ લગભગ હોય છે.

ક્યાં સુધી જખ્મી જટાયુને તમે પંપાળશો?

લાગણીને તે વળી ક્યાં હાથ ને પગ હોય છે!

દર વખત અમને બઘા એવા જ નિર્ણાયક મળ્યા,

એમના નિર્ણય વિશે પોતે જ સગડગ હોય છે.

નાગને તો માત્ર એના તાળવામાં ઝેર છે,

ચેતજે માણસથી, માણસમાં રગેરગ હોય છે.

ફૂલના પહેરેગીરોને કોણ સમજાવે ખલીલ!

ખુશબૂઓ માટે ઉઘાડા લાખ મારગ હોય છે.

Riktata, Gulmhor, Liluchhamm, Lagolag Hoy Chhe