રેખ્તા
હિન્દવી
સૂફીનામા
રાજસ્થાની
નથી જાણ કે હાથ કોનો અડ્યો છે,
સમયના શરીરે ઘસરકો પડ્યો છે.
મળ્યો વારસામાં ફકત કેસનંબર,
ઘણા વર્ષથી ન્યાય ધક્કે ચડ્યો છે.
એ કીટલી, એ મિત્રો ને ચા સાથે બેઠક,
મને મોક્ષનો મસ્ત રસ્તો જડ્યો છે.
ખુશામત કરીને જે સીડી ચડેલો
આ નવ્વાણુંએ સાપ એને નડ્યો છે.
દિવસભર કર્યો ડોળ ભૂલી ગયાનો,
પછી રાતભર એકધારો રડ્યો છે.
નગરના નગર થઈ ગયા રાજદ્રોહી,
શહેનશાહે જબરો મુસદ્દો ઘડ્યો છે.
સ્રોત
- પુસ્તક : કવિ તરફથી મળેલી કૃતિ