ઘૂંટ પી જઈંશ; મને પ્રેમ કર

ઘૂંટ પી જઈંશ; મને પ્રેમ કર

હું બચી જઈંશ; મને પ્રેમ કર

બધા વેદ ગ્રંથ પુરાણ સૌ; હું કળી જઈશ; મને પ્રેમ કર
એક શબ્દમાં એક શ્લોકને; હું રચી જઈશ; મને પ્રેમ કર

હું ખીલી ગયો તને જોઈને; હું ખરી જઈશ; મને પ્રેમ કર
છું તૂટી જવાની અણી ઉપર; હું ટકી જઈશ; મને પ્રેમ કર

હું ય સૂર્ય છું; હું ય ચંદ્ર છું, હું ઊગી જઈશ, મને પ્રેમ કર
હું નથી જ સુંદર તે છતાં હું ગમી જઈશ! મને પ્રેમ કર

અડીખમ ઊભો હું પહાડ-શો; હું ઝૂકી જઈશ; મને પ્રેમ કર
હું અમસ્તો બેઠો નથી અહીં; હું ઊઠી જઈશ; મને પ્રેમ કર

વધસ્તંભ હોય કે હો શૂળી; હું ચઢી જઈશ; મને પ્રેમ કર
ડર છે મને સમજુઓમાં; હું ખપી જઈશ; મને પ્રેમ કર!

ગુમ હું થયો છું ન જાણે ક્યાં, હું મળી જઈશ; મને પ્રેમ કર
છું જનમથી શ્વાસની કેદમાં; હું છૂટી જઈશ; મને પ્રેમ કર.

ghoont pi jainsh; mane prem kar