રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો
રજિસ્ટ્રેશન કરો
રેખ્તા
હિન્દવી
સૂફીનામા
રાજસ્થાની
ચોપાટને સંકેલીએ
chopatne sankeliye
રજનીકાન્ત સથવારા
રજનીકાન્ત સથવારા
સાવ નક્કામી નથી, સારીય છે.
એક રેખા હાથમાં તારીય છે.
જેટલી ભૂલ્યા કરી છે મેં તને,
એટલી ક્યારેક સંભારીય છે.
મેં મને મારા મહીં રહેવા દીધો,
ભૂલ એમાં કંઈક તો મારીય છે.
ડામ ઊપર ડામ જ્યાં દીધા હતા
એ સમયની પીઠ પસવારીય છે.
મેં જ વિસ્તરતી મૂકેલી તે છતાં
વેદનાને ક્યાંક તો વારીય છે.
એટલો હું કાંઈ પાવરધો નથી
જિંદગી સામે શરત હારીય છે.
ચાલ આ ચોપાટને સંકેલીએ
સોગઠામાં એક સોપારીય છે.
સ્રોત
- પુસ્તક : ગુજરાતી કવિતાચયન ૧૯૯૭ (પૃષ્ઠ ક્રમાંક 82)
- સંપાદક : હેમન્ત દેસાઈ
- પ્રકાશક : ગુજરાતી સાહિત્ય પરિષદ
- વર્ષ : 2000