પ્રેમના પરથમ પગથિયે ચાંદ તોડી લાવશે

પ્રેમના પરથમ પગથિયે ચાંદ તોડી લાવશે,

કાં વસંતતિલકાને ખુશ કરવા ગઝલ સંભળાવશે.

લ્યો, હવે તો સૂર્ય ઊગ્યો, હોલવી નાખો મને,

કોઈ પાછો સાંજે આવીને મને સળગાવશે.

ના, મને મૃત્યુ પછીની સ્હેજ પણ ચિંતા નથી,

હું રહું છું એવા ઘરમાં કે કબર પણ ફાવશે.

ધોમ તડકામાં કોઈનો છાંયડો માગી તો જો,

શક્ય છે કે આંખ સામે આયના ચમકાવશે.

દીકરાની રાહ જોતી ફોન પર બેઠી છે મા,

ગામની ડોશી હવે કાગળ નહીં વંચાવશે.

બસ હવે ભૂતકાળના જખ્મોને ખોતરશો નહીં,

ગઈ સદીને એ નવેસરથી ફરી ઉથલાવશે.

આ નદી છે, એને ચોમાસું જ છલકાવી શકે,

માવઠું એકાદ-બે ખાબોચિયાં છલકાવશે.

premnaa partham pagathiye chaand todii laavshe